Регистрация
Инникигэ эрэли, сырдыкка тардыһыыны түстээн
2014-01-160679Хайдах олороҕут, тыа сирин дьоно?Үүммүт 2014 сылы көрсө культуура үлэһиттэрэ бэйэлэрин нэһилиэктэрин олохтоохторугар көрдөөх – нардаах дьикти түгэннэрдээх бырааһынньыктааҕы биэчэрдэри тэрийэн Культуура сылынан бэлэх ууннулар.
КүҺүүр. “Чолбондор” культуурунай сынньалаҥ киин үлэһиттэрэ нэһилиэк участковай балыыһатын, оскуола, “Чуораанчык” детсад уонна “Булун” тэрилтэлэрин хабан театрализованнай шоу бэлэмнээн, Саҥа Дьыл үүнэр түүнүгэр Күһүүр олохтоохторо тымныы тыйыс дойдуттан куйаас-итии Африкаҕа, ырыа-үҥкүү олохсуйбут Индияҕа, сайаҕас санаалаах дьоннордоох Германия уонна Россия араас куораттарыгар ыалдьыттаатылар. Маны тэҥэ сарсыҥҥытыгар,өйүүҥҥүтүгэр бырааһынньык салҕанан араас куонкурустар, 80-с сыллардааҕы кэмнэри санатар ностальжи-биэчэргэ үҥкүүлээн, үөрэн-көтөн Дьөһөгөй сылын көрүстүлэр. Онтон кырачааннарга сахалыы “Таал-таал уонна киһи-киһичээн” остуоруйаны “ Сулусчаана” театральнай кружок эдэркээн артыыстара бэлэхтээтилэр.
Ороһуоспа бырааһынньыгар 2013 сыл түмүгүнэн нэһилиэк бастыҥ спортсменнара чиэстэннилэр. Стручков Николай Вячеславович –“ Сыл бастыҥ спортсмена”, спорт бэтэрээнэ Семен Семенович Шамаев – “ Спортка бэриниилээҕин иһин”, Күһүүр орто оскуолатын 8-с кылааһын үөрэнээччитэ Бочаров Василий “ Эдэр кэскиллээх спортсмен”, Слепцов Афанасий Афанасьевич –“ Бастыҥ тренер”, олохтоох дьаһалта хамаандата-“Бастыҥ спортивнай дьахтар хамаандата”, дьиэ-уот коммунальнай хаһаайыстыба хамаандата – “Бастыҥ спортивнай эр дьон хамаандата” номинациялар хаһаайыттарынан буоллулар.
Ньайба. “Маранга” этно-культурнай сынньалаҥ киин Дьөһөҕөй сылын көрсө нэһилиэнньэ киэҥ араҥатын хабан Саҥа Дьыллааҕы бырааһынньыгы тэрийэн ыытта. Олохтоох дьаһалта нэһилиэк тэрилтэлэрин кытта сүбэлэһэн баран ааспыт 2013 сыл түмүктэринэн тыа хаһаайыстыбатын туйгун үлэһиттэрин, үрдүк ситиһиилээх тэрилтэ салайааччытын, нэһилиэк иһинэн ыытыллар культурнай-спортивнай күрэхтэр кыайыылаахтарын наҕараадалаата. Ол курдук Альберт Андреевич уонна Александра Николаевна Яковлевтар дьиэ кэргэттэрэ “ Саамай актыыбынай дьиэ кэргэн”, Анна Николаевна Стручкова “ Актыыбыыс бэтэрээн”, Валериан Валерьевич Спиридонов “ Сыл бастыҥ спортсмена”, Матрена Прокопьевна Горохова “Бастыҥ салайааччы”, Михаил Афанасьевич Корякин “Сыл бастыҥ ырыаһыта”, Изабелла Алексеевна Хантакова уонна Наталья Николаевна Никитина “Нэһилиэккэ ыытыллар мероприятиялар актыбыыстара” номинация хаһаайыттарынан буоллулар. Сылтан - сыл бэйэтин сыралаах үлэлэринэн үрдүк ситиһиини ситиспит Николай Дмитриевич Никитин – “Сыл бастыҥ балыксыта” уонна Юрий Николаевич Захаров – “ Сыл бастыҥ табаһыта” номинациялар хаһаайыттарынан ааттаннылар.
Сииктээх. 2014 – Үрүҥ Айыы Тойон сыла (сахалыы халындаарынан ылан көрөр буоллахха) инникигэ эрэли, сырдыкка тардыһыыны түстээн сынньалаҥ киин үлэһиттэрэ Сииктээх сэлиэнньэтин олохтоохторугар Саҥа Дьыллааҕы Бал Маскарад, оҕолор утренниктарын тэрийэн ыыттылар.
Таймылыыр. “Үҥкээбил” этно-культурнай кииҥҥэ олохтоохтор кыралыын улаханныын Дьөһөҕөй сылын көрсүү бырааһынньыктарыгар дуоһуйа ыллаан-туойан, үҥкүүлээн, араас куонкурустарга кыттан бириистэргэ тиксэн бөһүөлэккэ ититэр хочуолунайдара саахаланныытын түмүгэр сорох олохтоохтор олорор дьиэлэрэ тымныйбытын улахаҥҥа ылыммакка үүммүт сыл үтүөнү эрэ түстүө диэн эрэл кыымынан көрүстүлэр.
Бэлэмнээтэ Евдокия БАИШЕВА
Ещё по теме:
2018-09-18
Городской парк Якутска обнесли забором2017-12-10
Глава Республики Саха (Якутия) Егор Борисов вместе с супругой Прасковьей Петровной посетил многодетную семью Гладких в поселке Мохсоголлох Хангаласского улуса и поздравил их с новосельем.2017-12-09
Путин назвал отстранение России от Олимпиады срежиссированным2017-05-02
Эйэ, үлэ, МААЙ: Тиксии олохтоохторо Маайдааҕы хаамыыга таҕыстылар2017-05-02
На Первомайский парад вышли более 500 тиксинцев
Комментарии