Регистрация
Бороҕоҥҥо Үрүҥ тунах ыһыах
2015-07-140613Ыһыах-2015Ыһыаҕы төрүттээбит киһинэн Эллэй Боотур буолар. Итинэн ситимнээн Эллэй Боотур сахалар үрүҥ итэҕэллэрин үөскэппит өбүгэбитинэн ааҕыллар.
ЫҺЫАХ – саҥа дьылы, саҥа өҥү бэлиэтиир хаһаайыстыба халандаарын кытары ситимнээх бырааһынньык. Итэҕэл өттүнэн ылан көрдөххө, ыһыах былыргы сүнньэ "Күн таҥараны" уруйдааһын, кини саас айылҕаны уһугуннарыыта-чэбдигирдиитэ, үүнээйи от, быйаҥ ситиһиитин үөскэтэр, төрөтөр күүһүгэр сүгүрүйүү буолар. Ыһыахха эмээхсин кэлэр саҥа былааччыйа кэтээри, кыыс – саҥа ытарҕа кэтээри, уол – күүһүн холоноору, оҕо-аймах ыллаары-туойаары, оонньоору-көрүлээри, кымыс иһээри, алгыс ылаары.
Бороҕон нэһилиэгэр от ыйын 4 күнүгэр – Улуу тунах ыһыах, саха төрүт итэҕэлин уонна общественнай хабааннаах бырааһынньыга буолан ааста. Ыһыах – Үрүҥ Айыы тойон, былыргы Күн таҥарата торумнаабыт, алҕаабыт кымыһынан мустубут дьону айах тутууттан саҕаланна. Уус-уран литература сылынан сибээстээн “Күн Тэгиэримэ” олоҥхоттон быһа тардыыны “Омолой” этноцентр үлэһиттэрэ туруоран дьон биһирэбилин, махталын ыллылар.
Ыһыах арыйыы сиэрин-туомун тутуһан алгыһын оҥордо орто оскуола дириэктэрэ, саха тылын, литературатын учуутала Ж.П.Осипова.
"Айхаллан самаан сайын, айхаллан үлэ киһитэ" бырааһынньыктааҕы концеры салайан ыыттылар Хотугулуу-илиҥҥи Федеральнай университет саха тылын салаатын устудьуона Борис Осипов, Чурапчытааҕы физкультурнай институт 3 курсун устудьуона Варя Горохова.
Эҕэрдэ тылы эттэ олохтоох бэйэни салайыныы баһылыгын эбээһинэһин толорооччу Саха Республикатын үөрэҕириитин туйгуна, СР (Ил Түмэн) Государственнай мунньаҕын депутатын көмөлөһөөччүтэ Е.П. Бочкарева. Булуҥ улууһа төрүттэммитэ 85 сылын көрсө, Улуу Кыайыы 70 сыллаах Юбилейнай ыһыаҕынан эҕэрдэлээтэ. “Сэрии оҕолоро” юбилейнай мэтээллэри ытык-мааны кырдьаҕастарга туттартаата, нэһилиэк төрүт олохтоохторугар, сылгыны-сүөһүнү ииттэр, үрүҥ-ас өлгөмүн ылар, чөл, доруобай олохтоох дьиэ-кэргэттэргэ: Антонина Терентьевна, Сергей Павлович Стручковтарга; Мария Николаевна, Егор Семенович Гороховтарга; Прасковья Николаевна, Петр Николаевич Бурцевтарга нэһилиэк дьаһалтатын аатыттан Почетнай грамоталары, өйдөбүнньүк бэлэхтэри туттарда.
Олохтоохтор түөлбэлэринэн эрдэттэн хамыыһыйа тэринэн бэлэмнэнэн, концерт, күрэхтэһиилэр, “Дыгын оонньуулара” үрдүк таһымҥа аастылар. Уопсай түмүккэ элбэх сахалыы таҥаһы таҥнан, конкурска барытыгар кыттан:
1 миэстэ – "Эрчим" түөлбэ (сал. Е.В. Слепцова);
2 миэстэ – "Кустук" түөлбэ (сал. Г.Э. Горохова);
3 миэстэ – "Дьүкээбил", "Саһарҕа" түөлбэлэр (сал. С.В. Слепцова, С.П. Петрова) кыайыылаах таҕыстылар.
“Сандалы остуол” күрэҕэр 36 араас сахалыы ас астааннар “Дьүкээбил”, “Саһарҕа” түөлбэлэр кыайыылаах үрдүк аатын ыллылар. «Оһуохай оһуора» сахалыы таҥаска, "Долгулдьуйар уһун суһуох" конкурстарга элбэх киһи бэлэмнэнэн кэлбитэ биһирэнэр. Оһуохай этиигэ Зоя Владимирова, Елена Бурцева, эдэр этээччи Вияна Стручкова тэҥнээхтэрин булбатылар, хомуска Борис Осипов айылҕа уһуктуутун ойуулаан дьүрүһүйүүтэ элбэх киһи биһирэбилин ылла. “Дыгын оонньууларыгар” Игорь Горохов кыайыылаах үрдүк аатын ылла, эдэр спортсмен 10 кылаас үөрэнээччитэ Антон Старостин 2 түһүмэххэ тэҥнээҕин булбата. Эдэр киһиэхэ ситиһиилэри баҕарабыт.
Ыһыаҕы былыр-былыргыттан үөһээҥҥи таҥаралары, ордук чуолаан Үрүҥ Айыы тойону кытары силбэһии курдук өйдүүллэрэ. Онон үөһээҥҥи айыылартан күүс ылан сирэйдиин сырдаатыбыт, дууһалыын ырааһырдыбыт. Бэйэ бэйэбитин эҕэрдэлэстибит, алгыс ыллыбыт, санаабыт көнньүөрдэ. Маннык тэрээһиннээх мероприятиелар буола турдуннар.
Р.А.Стручкова,
Бороҕон нэһилиэгин олохтооҕо
Ещё по теме:
2018-09-18
Городской парк Якутска обнесли забором2017-12-10
Глава Республики Саха (Якутия) Егор Борисов вместе с супругой Прасковьей Петровной посетил многодетную семью Гладких в поселке Мохсоголлох Хангаласского улуса и поздравил их с новосельем.2017-12-09
Путин назвал отстранение России от Олимпиады срежиссированным2017-05-02
Эйэ, үлэ, МААЙ: Тиксии олохтоохторо Маайдааҕы хаамыыга таҕыстылар2017-05-02
На Первомайский парад вышли более 500 тиксинцев
Комментарии