Регистрация
Статья
Виталина эмтэнэ Израильга көттө
2015-06-060886Амарах санааКып кырачаан Виталина ыарыыта – кини бэйэтин уонна төрөппүттэрин, чугас дьонун эрэ кыһалҕата буолбатаҕын өссө биирдэ БУЛУҤНАР бигэргэттилэр. Бу туһунан кыысчаан ийэтэ Тамара Слепцова олус долгуйан туран аһымал кэнсиэр кэнниттэн махтал тылыгар эппитэ.
Кыысчаан гипоплазия уонна бульбарнай паралич диэн бэрт сэдэх ыарыылаах. Ол эбэтэр аһы ыйыстар рефлекса сайдыбатах. Төрөппүттэрэ Тамаралаах Владимир кырачааннарын куртаҕар быһа холбоммут аппарат нөҥүө аһаталлар. Россия быраастара маннык ыарыыны тохтоторго өссө уопуттара суох. Онон оҕону Израиль быраастара эмтииргэ сөбүлэҥнэрин биэрбиттэр. Операциятыгар биир мөлүйүөн харчы ирдэнэр.
Аһымал кэнсиэри иилээн-саҕалаан ыыппыт биир дойдулаахпыт Саина бу курдук кэпсиир:
– Томочка, Виталина ийэтэ, Күһүүргэ оҕо саадыгар сылдьыбыт оҕочоон эбит. Кини ийэтэ Валентина Константиновна оскуолаҕа учууталлаабыта. Чугас билэр дьоммут маннык кыһалҕалаахтарын саҥа билбиппит уонна көмөлөһөргө санаммыппыт. Мин бу иннинэ дойдубар бара сылдьан, буурҕаҕа түбэһэн, муора кытыытыгар хаайтаран, ыраас халлаан анныгар баар үүтээҥҥэ олорон хаалбыппыт. Ол кэннэ дьонум миигин ыраастаммыккын диэбиттэрэ. Аны биир дойдулаахтарым бэйэлэрин олохторун кэпсээн, хайдах-туох буолабыт диэн толкуйдарын аһаҕастык үллэстэллэрэ. Кырдьык, бу түгэн кэнниттэн мин хайаан да туох эрэ үтүөнү оҥоруохтаахпын дойдубар, дьоммор диэн санаам өссө күүһүрбүтэ. Дьокуускайга кэлэн күһүүрдэр түмсүүлэрин тэрийэргэ этии киллэрэн, көрсүһүү оҥорбуппут. Онно быйылгы сүлүөтү көрдөрөн, ыллаан-туойан дойдуга ахтылҕан киэһэтин тэрийбиппит. Онно билбиппит Валентина сиэнэ итинник ыалдьыбытын, көмөҕө наадыйалларын. Бары биир киһи курдук көмөлөһөргө санаммыппыт уонна ити кэнсиэр тэрийдибит. Киһи аһыныгас сүрэхтээх, түмсүүлээх, дойдутун, норуотун таптыыр буоллаҕына – ыарахаттары хоһуун санаалаах туоруур. Биһиги эмиэ оннук сыалы туруорунабыт.
Онтон депутат Елена Голомарева аһымал тэрээһин кэнниттэн бэйэтин санаатын бу курдук үллэстэр:
– Саха сирин дьоно-сэргэтэ ыарахан кэмҥэ биир санааҕа түмсэр идэлээх. Ити биһиги норуот быһыытынан уратыбыт буолар. Кэнники сылларга аһымал хамсааһына бары оройуоннарга, куораттарга биирдиилээн дьон, общественность көҕүлээһининэн элбэхтик тэриллэр буолла. Ол курдук, булуҥнар эмиэ бииргэ алтыһан үлэлээбит киһилэрин Валентина Константиновна сиэнэ Виталина ыраах дойдуга операцияҕа барарыгар көмө буолбуттара хайҕаллаах уонна махталлаах.
Виталина ийэтэ Тамара оҕо сааһа Күһүүр бөһүөлэгэр ааспыта. Тамара ийэтэ Валентина Константиновна Сыромятникова-Саввинова Күһүүр орто оскуолатыгар учууталынан үлэлээбитэ. Оскуола уонна оҕо саадын коллективтара ыраах Күһүүртэн бэйэлэрин көмөлөрүн кэмбиэргэ уган ыыппыттар.
Матырыйааллары бэлэмнээтэ
Полина НИКОЛАЕВА
Ещё по теме:
2017-04-01
Хас биирдии киһи доруобуйатын туһугар кыһаллыахтаах2016-12-06
В Арктической гимназии действует стоматологический кабинет2016-10-22
Идет вакцинация от гриппа2016-06-30
«Сердца Арктики»2016-06-15
Здоровье каждого человека находится в его руках